友人一個很有意思及感人的分享，經她同意後在此轉載:
今朝因事到荃灣裁判處出庭, 因為冇交罰款...不多談為何被罰兼要出庭, 只想分享一點今早見到既事及心情。
我九時三十分到荃灣二號法庭, 我同大家一樣, 向職員報到後到"聽審欄"坐著直至法官出現, 當時與二十多個年約四至六十歲的人一齊坐。細心看法庭每個角落, 聽人家閒談, 再望望之後來的"當事人", 發現不少人對出庭一事不覺陌生。
開庭後, 職員放一支咪在法庭中間, 叫當事人行出來回答, 職員逐一讀出名字及每人被告的原因。初初聽到幾個, 我笑了出來...因為聽到職員讀:「乜乜乜, 你被控於08年某月某日在某地點放置蔬菜、發泡膠箱、筲、紙牌, 佔地0.7x0.6平方米, 阻礙公眾地方」法官：「你認不認罪﹖」「認」 (廿多人中我聽不到有別個答案, 有人不答但都會點頭)法官：「那麼罪名成立, 阻街罰300, 非法擺賣罰250, 到下面會計部繳交。」 之後數人都差不多, 不同是橙, 蘋果, 衫, 魚, 枮板, 刀...都是兩條罪, 罰款銀碼有些少不同。 後來又聽到法官加了台詞: 「你有21次同樣紀錄, 有沒有話要說?」「控方要求將檢獲物品充公, 你有沒有話要說?」 (全部無人出聲或只有搖頭)
有一位伯伯, 被控在一個極偏僻地方放40卷衛生紙在擺賣, 占地xxx平方米...同樣係被控兩條罪, 有三次同樣紀錄, 檢獲物品全部充公。他有回答說：「法官大人, 我連上次既罰款都未有錢交, 我根本冇錢俾, 我只係拎住兩條廁紙...都做左幾十年小販, 我唔做小販有咩好做呀?」法官問他年齡: 70, 問佢幾時可交罰款: 根本交不出, 我賣廁紙, 法官話再不交會有機會坐監, 他沒有說話, 最後他被罰每條罪150, 法官給他寬限兩個月交罰款, 伯伯邊行邊細聲埋怨：「上個月拉完, 依家又黎, xxxx」
我不想評論...只是感受很深, 在庭上一路聽各人案件一路流眼淚, 失了控不斷流, 法官同職員都不時望住自己, 好醜...我不明為什麼, 總之覺得好難受。
法官每審畢約十人, 檔案都會被送去會計部, 上完庭的人就入去等"結帳", 見到又係另一種光景:有幾個交款既人竟然分別遇到熟人。「喂, 最近好嗎?」「你話呢?」「希望唔好再俾我0係呢度再見到你, 哈哈」「喂, 交完罰款嗱? 駛唔駛坐監呀? 」「哈哈哈」有個"大聲公"在講電話「我飲緊茶, 一陣返黎...係呀, 都話飲緊茶, 你食左飯未呀?...」後面所有等"結帳"的人都在笑他說這個謊, 包括我。那人收線後也回頭報笑。
呢班小販好有型呀!!!! 這是我在荃灣裁判處的兩小時。之後同媽媽到附近飲茶, 講起我都想做小販, 一齊走鬼, 法庭見! Phoebe
No comments:
Post a Comment